17-18 მაისს გაიმართა საგარეო საქმეთა მინისტრის მოადგილის, დავით დონდუას ვიზიტი ირლანდიაში.

ვიზიტის ფარგლებში დავით დონდუა შეხვდა ირლანდიის პარლამენტის წარმომადგენლობითი პალატის თავმჯდომარეს,  შონ ო'ფარელს, ირლანდიის საგარეო საქმეთა და ვაჭრობის დეპარტამენტის გენერალურ მდივანს, ნაიალ ბურჯესს, საგარეო უწყებაში ირლანდიის, გაერთიანებული სამეფოსა და ამერიკის განყოფილების გენერალურ დირექტორს, ადრიან ო'ნილს, ევროპის განყოფილების გენერალურ დირექტორს, ოუნ ო'ლირის, ასევე ევროკავშირის სპეციალურ წარმომადგენელს კოლუმბიის სამშვიდო პროცესის საკითხებში, ირლანდიის ყოფილ საგარეო საქმეთა მინისტრს, ეიმონ გილმორს.

ვიზიტის ძირითად ამოცანას წარმოადგენდა ირლანდიური მხარისათვის საქართველოში კონფლიქტისა და ოკუპირებულ ტერიტორიებზე არსებული ვითარების შესახებ ინფორმაციის მიწოდება და ირლანდიური გამოცდილების გაზიარება კონფლიქტის დარეგულირებისა და სამშვიდობო მოლაპარაკებების კუთხით.

შეხვედრებზე საუბარი შეეხო აგრეთვე საქართველოში მიმდინარე დემოკრატიულ რეფორმებსა და ქვეყნის საგარეო პოლიტიკურ დღის წესრიგს. განხილულ იქნა საქართველოს ევროპულ და ევროატლანტიკურ ინტეგრაციასთან დაკავშირებული საკითხები. ხაზი გაესვა ევროკავშირთან სავიზო ლიბერალიზაციის პროცესის დასრულებისა და ნატო-ს ვარშავის სამიტზე საქართველოს მიერ მიღწეული პროგრესის სათანადოდ ასახვის მნიშვნელობას.

საგარეო საქმეთა მინისტრის მოადგილემ ირლანდიურ მხარეს ინფორმაცია მიაწოდა საქართველოს ოკუპირებულ ტერიტორიებზე უსაფრთხოების, ადამიანის უფლებებისა და ჰუმანიტარული კუთხით არსებული რთული ვითარების შესახებ. პარტნიორებს გააცნო საქართველოს ხელისუფლების პოლიტიკა და მიდგომები კონფლიქტის მშვიდობიანი დარეგულირების კუთხით.

თავის მხრივ, ირლანდიურმა მხარემ კიდევ ერთხელ დაადასტურა საქართველოს სუვერენიტეტისა და ტერიტორიული მთლიანობის მხარდაჭერა. მათ საგარეო საქმეთა მინისტრის მოადგილეს ინფორმაცია მიაწოდეს ჩრდილოეთ ირლანდიის კონფლიქტის გადაწყვეტის, სამშვიდობო მოლაპარაკებების მიმდინარეობისა და დარეგულირების პროცესში შექმნილი გამოწვევების შესახებ. გამოითქვა ასევე მზაობა საქართველოსთან ორმხრივი თანამშრომლობის შემდგომ გაღრმავებასთან დაკავშირებით.

ვიზიტის ფარგლებში დავით დონდუამ ინტერვიუ მისცა ირლანდიურ გაზეთს „The Irish Times" და სიტყვით გამოვიდა წამყვან ანალიტიკური ცენტრში - საერთაშორისო და ევროპულ საქმეთა ინსტიტუტში (IIEA).