საქართველოს სახალხო დამცველმა უჩა ნანუაშვილმა მოწვევის წერილი გაუგზავნა გაეროს სპეციალურ მომხსენებელს შშმ პირთა უფლებების დაცვის საკითხებზე ქალბატონ კატალინა დევანდას აგილარს. მოწვევის მიზანია შშმ პირთა მიმართ უფლებადარღვევების ინდივიდუალური შემთხვევებისა და უფრო ფართო, სისტემური ხასიათის დარღვევების გარემოებათა შესწავლა, სამართლებრივი შეფასება და რეაგირების ქმედითი მექანიზმების იდენტიფიცირება, რაც ხელს შეუწყობს ქვეყანაში შშმ პირთა უფლებების დაცვის მდგომარეობის გაუმჯობესებას.

მოწვევის წერილში საუბარია ქვეყანაში  შშმ  პირების წინაშე არსებულ ისეთ პრობლემებზე, როგორიცაა სახელმწიფოს სოციალური პროგრამებით გათვალისწინებული ღონისძიებების არაეფქტრურობა, შშმ პირთა აღრიცხვიანობის შესაბამისი სისტემის არარსებობა, შშმ პირთა სიღარიბის მაღალი მაჩვენებელი, დასაქმებისა და შემოსავლების წყაროს მოძიების მწირი შესაძლებლობები; არაადაპტირებული ფიზიკური გარემო, ჯანდაცვაზე, განათლებასა და ინფორმაციაზე შეზღუდული ხელმისაწვდომობა, საზოგადოებაში ფართოდ გავრცელებული სტერეოტიპული დამოკიდებულებები შშმ პირთა მიმართ.

საქართველოში ჩამოსვლა სპეციალურ მომხსენებელს საშუალებას მისცემს ადამიანის უფლებათა ირგვლივ არსებული მდგომარეობის და კონკრეტული ინსტიტუციური, სამართლებრივი, სასამართლო თუ ადმინისტრაციული სიტუაციის ზოგადი შეფასება მოახდინოს. ვიზიტის განმავლობაში ის შეხვდება ხელისუფლების, არასამთავრობო ორგანიზაციების, სამოქალაქო საზოგადოების წარმომადგენლებს, ასევე ადამიანის უფლებათა დარღვევის მსხვერპლებს, ქვეყანაში მოქმედ გაეროს სააგენტოთა ჯგუფებს, აკადემიური, დიპლომატიური წრეებისა და მედიის წარმომადგენლებს, შედეგად შეიმუშავებს რეკომენდაციებს, რომლებიც საჯარო ანგარიშების სახით გამოქვეყნდება.

სახალხო დამცველი იმედოვნებს, რომ შშმ პირთა უფლებების დაცვის საკითხებზე გაეროს სპეციალურ მომხსენებელთან წარმატებული თანამშრომლობისა და ვიზიტის განხორციელების შემთხვევაში, მთავრობისა და სხვა პასუხისმგებელი მხარეების რეაგირების ღონისძიებები უფრო ეფექტური გახდება, რაც აისახება შშმ პირების უფლებრივი მდგომარეობის გაუმჯობესებაზე ქვეყნის მასშტაბით.