ქალაქ რუსთავის მერია ახალი ინიციატივით გამოდის. მიმდინარე წლის სექტემბრიდან რუსთავში რეგისტრირებული სოციალურად დაუცველი მრავალშვილიანი ოჯახების წევრი სტუდენტებისთვის ახალი პროგრამა - ,,მერიის სოციალური სტიპენდია’’ ამოქმედდება. რუსთავის მერმა დავით ჯიქიამ აღნიშნული სიახლე ახალგაზრდებს დღეს პირადად გააცნო და აღნიშნა, რომ მომავალში ბენეფიციართა რიცხვი გაიზრდება და პროგრამით სხვა სოციალური კატეგორიების წარმომადგენლებიც ისარგებლებენ. 
პროგრამის მიხედვით, ქალაქის მერია სოციალურად დაუცველ და მრავალშვილიანი ოჯახების წარმომადგენელ სტუდენტებს რუსთავი-თბილისის მარშრუტზე მგზავრობისთვის პირად ანგარიშზე ყოველთვიურად 60 ლარს ჩაურიცხავს. აღნიშნული პროგრამა რუსთავში მცხოვრებ სტუდენტთა სოციალური ფონის გაუმჯობესებას შეუწყობს ხელს. სტუდენტებთან შეხვედრას რუსთავის მერიის ა(ა)იპ ,,რუსთავის ახალგაზრდობის განვითარებისა და ხელშეწყობის ცენტრის’’ ხელმძღვანელი გიგა ჯღარკავა და თვითმმართველობის სხვა წევრებიც დაესწრნენ.