არჩევნების სანდოობის რისკების მართვის გეგმა 20 მაისს გამართულ სხდომაზე დამტკიცდა, სადაც ცესკოს თავმჯდომარე თამარ ჟვანიამ განაცხადა, რომ ეს გეგმა რამდენიმეწლიან პერსპექტივაში, მნიშვნელოვან შედეგს მოუტანს საარჩევნო ადმინისტრაციას და ზოგადად საარჩევნო პროცესს - „ასეთი ტიპის დოკუმენტზე ცესკომ პირველად მიიღო გადაწყვეტილება. ის 4 წელზეა გაწერილი და გეგმის შემუშავებისთვის ძირითადი საფუძველი არის კვლევა და შედეგები, რომელიც საარჩევნო სისტემების საერთაშორისო ფონდმა 2014 წლის არჩევნების შემდეგ განახორციელა და მოიცავს 2012, 2013, 2014 წლების არჩევნებს,“ განაცხადა თამარ ჟვანიამ სხდომაზე.
საარჩევნო ადმინისტრაციაში რისკების მართვის გეგმა რამდენიმე თვის განმავლობაში მუშავდებოდა. პროცესში ჩართული იყვნენ, როგორც ცესკოს წევრები და აპარატი, ისე საარჩევნო სისტემების საერთაშორისო ფონდის (IFES) ექსპერტები.
არჩევნების სანდოობის რისკების მართვის გეგმა 2015-2019 წლების სტრატეგიული გეგმით არის გათვალისწინებული და IFES-თან აქტიური თანამშრომლობით შემუშავდა.