"ნაციონალური მოძრაობის" თბილისის ორგანიზაციის ხელმძღვანელმა ნიკა მელიამ "პოსტკრიპტუმთან" საუბრისას კორცხელში მომხდარ დაპირისპირებაზე ისაურა. მელია, მომხდარში "ქართულ ოცნებას" ადანაშაულებს.  

„ეს ხალხი იყო საგანგებოდ ჩამოსული კორცხელში, უმრავლესობა მათგანი დარწმუნებული ვარ ახლოსაც არ იყო გავლილი კორცხელთან. არც ერთი არ იყო ადგილობრივი მკვიდრი. ყველა სპორტსმენი, ე.წ. კალაძის ბანდა, კუნთიანი მაგარი ბიჭები, ბრჭყალებში პატრიოტი ბიჭები, სამ კილომეტრში ცხოვრობს გიგა ოთხოზორია და იქ არის დასვენებული და ზრდილობა უნდა ყოფნიდეს ადამიანს, რომ ასეთი რამ არ ჩაიდინო, როდესაც ერი არის ასეთი მწუხრის ქვეშ.

მათ ჰქონდათ დავალება საგანგებო, რომ ეს ყველაფერი მოეწყოთ. გუშინდელი დღიდან როგორც ვოლიერიდან გამოქცეულები დარბოდნენ, ორმოცი ადამიანი, ხელკეტებით შეიარაღებულები. თქვენ ნახეთ კადრები, ორი უბანია აქ და ხან ერთ უბანზე დარბოდნენ და ხან მეორე უბანზე. ჩვენი ინფორმაციით, აპირებდნენ მსგავსი დარბევის მოწყობას დაახლოებით საღამოს 6:00 საათიდან 8:00 საათამდე, მაგრამ როგორც ჩანს გეგმა შეეცვალათ და ორის ნახევარზე მოხდა ის რაც მოხდა. მათ ჰქონდათ ინფორმაცია, რომ ძალიან დიდი შანსი აქვს "ნაციონალური მოძრაობის" კანდიდატს, რომ გაიმარჯვოს ამ არჩევნებში და ყველაფერს აკეთებდნენ იმისთვის, რომ არჩევნები ჩაეშალათ,“ - განაცხადა ნიკა მელიამ.