ავსტრალიელი მაშველები ეძებენ ქალს, რომელიც ცურვის დროს ნიანგმა გაიტაცა. ტელეარხ ABC-ის ინფორმაციით, ინციდენტი კვინსლენდის შტატში დეინტრის ეროვნულ პარკში მოხდა.

გავრცელებული ინფორმაციით, ორი ქალი წყალში იმ ადგილას ჩავიდა, სადაც ტრადიციულად ბევრი ნიანგი იყრის თავს. იმ დროს, როდესც ერთ-ერთი 46 წლის ქალი წყალში წელამდე შევიდა, მას თავს დიდი ნიანგი დაესხა.

”მისი 47 წლის მეგობარი ცდილობდა ქალის დახმარებას და უსაფრთხო ადგილზე გაყვანას, მაგრამ ვერ შეძლო”, - განუცხადა ჟურნალისტებს ადგილობრივმა პოლიციამ.

მაშველები ქალის ძებნას ღამით ცდილობდნენ, თუმცა სიბნელის გამო ეს შეუძლებელი აღმოჩნდა. სამძებრო ღონისძიებები გამნთენიისას განახლდა. ხელისუფლება ეჭვობს რომ ქალი ცოცხალი აღარ არის.

მისი მეგობარი საავადმყოფოში შოკურ მდგომარეობაში მოათავსეს. მას სხეულზე მსუბუქი დაზიანებები აღმოაჩნდა.

ამ ადგილზე მსგავსი შემთხვევა 2009 წელსაც მოხდა. 4,3 -მეტრიანი ნიანგი ხუთი წლის ბავშვს თავს დაესხა და წყალში ჩაათრია. მაშველებმა ბავშვის პოვნა ვერ შეძლეს.