კომპანიები სილქნეტი, ქლაბ ივერია და რედისონ ბლუ ივერია, მთავრობის მიერ ინიცირებული პროექტის „Check in Georgia” პარტნიორები ხდებიან.

30 მაისს, 18:00 საათზე სასტუმრო რადისონში საქართველოს კულტურისა და ძეგლთა დაცვის მინისტრი მიხეილ გიორგაძე, კომპანია სილქნეტის კომერციული დირექტორი - ნუგზარ ჩინჩალაძე, რედისონ ბლუ ივერიას გენერალური დირექტორი, ჯონ ლოსასო და კომპანია ქლაბ ივერიას წარმომადგენელი დიმიტრი აბულაძე, ხელს მოაწერენ თანამშრომლობის მემორანდუმს.

აღსანიშნავია ის ფაქტიც, რომ სწორედ ამ დღეს მოხდება ახალი პროდუქტის, ქლაბ ივერიას პრეზენტაცია, რომელიც წარმოადგენს ქართულ და უცხოურ ბაზარზე გათვლილ ლოიალურობის სისტემას. ქლაბ ივერიას მისიაა გაუადვილოს ტურისტებს წვდომა ქართულ ბაზარზე არსებულ კომპანიებზე და გახადოს ისინი ლოიალურები ქართული პროდუქტის მიმართ.

ამ ეტაპზე პროექტს „Check in Georgia“ უკვე შემოუერთდა საქართველოში მოქმედი 20-ზე მეტი ბიზნესსექტორის წარმომადგენელი;

შემუშავებულია სპეციალური საპარტნიორო პაკეტები, რომელიც კომპანიებს საშუალებას აძლევს, პროექტის ფარგლებში, მთელი ქვეყნის მასშტაბით, 19 ქალაქში დაგეგმილ 150-ზე მეტ კულტურულ ღონისძიებაზე წარმოჩინდნენ, როგორც „Check in Georgia“-ს პარტნიორები; მომხმარებელს შესთავაზონ საინტერესო მარკეტინგული ინიციატივები. კომპანიების პოზიციონირება მოხდება დაგეგმილი სხვადასხვა მარკეტინგული აქტივობისას, ამასთან, პროდუქტის მწარმოებელი, თუ მიმწოდებელი კომპანიები ღონისძიებებზე წარმოდგენილი იქნებიან საკუთარი პროდუქციით.

აღნიშნული კომპანიების მხრიდან საპარტნიორო პაკეტების სანაცვლოდ მიღებული მთლიანი შემოსავალი დაახლოებით 6 000 000 ლარს შეადგენს. ამასთან, მხოლოდ 3 კონცერტზე დასასწრები ბილეთების გაყიდვიდან შემოსავალმა შეადგინა 2 მილიონი ლარი.

როგორც ტურიზმის ეროვნული ადმინისტრაციის მონაცემები ცხადყოფს, ტურისტების მხრიდან დიდია ინტერესი ჩვენი ქვეყნის მიმართ; ბოლო თვის მაჩვენებლებით, უცხოელი მოგზაურების/ტურისტების რიცხვი, წინა წლის ანალოგიურ პერიოდთან შედარებით, 20% პროცენტით არის გაზრდილი.

„Check in Georgia“ არის პროექტი, რომელიც ქვეყანას მნიშვნელოვან ეკონომიკურ სარგებელს, მოსახლეობას კი, მეტ შემოსავალს მოუტანს.