ბათუმში Maroon 5-ის კონცერტზე დასასწრები ბილეთების 79%-ი უკვე გაყიდულია. როგორც საქართველოს კულტურისა და ძეგლთა დაცვის სამინისტროში განმარტავენ, დღეის მონაცემებით გაყიდულია 26 ათას 868 ბილეთი. მთლიანობაში კი Maroon 5-ის კონცერტზე დასწრებას 34 ათასი მელომანი შეძლებს  და სწორედ ამდენივე ბილეთის გაყიდვა იგეგმება www.tkt.ge-ს მეშვეობით.

7 ივნისს, ბათუმში Maroon 5-ის კონცერტის ბილეთები მოთხოვნადია  საზღვარგარეთაც. კულტურისა და ძეგლთა დაცვის სამინისტროს ინფორმაციით, Maroon 5-ის ბილეთები მყიდველი „TOP-10“ ასე გამოიყურება: აზერბაიჯანი, გერმანია, რუსეთი, სომხეთი, აშშ, დიდი ბრიტანეთი, იტალია, ისრაელი, უკრაინა და საფრანგეთი.

საერთო ჯამში Maroon 5-ის კონცერტის ბილეთების შესაძენად ტრანზაქცია 56 ქვეყნიდანაა განხორციელებული.

Maroon 5-ის კონცერტზე დასწრების მსურველთა რაოდენობა, რომ მაღალია ამას ისიც მოწმობს, რომ მაღალფასიანი ბილეტები tkt.ge-ზე განთავსებიდან 5 წუთში გაიყიდა.

რაც შეეხება Maroon 5-ის მასპინძელ ქალაქს, აქ სასტუმროები მთლიანად დაჯავშნილია.

აჭარის ტურიზმისა და კურორტების დეპარტამენტის ინფორმაციით, 5-8 ივნისს ბათუმში არსებული საშუალო და მაღალი კლასის სასტუმროებში ნომრების უმრავლესობა გაყიდული ან დაჯავშნილია. თავისუფალი ოთახები აღარ აქვთ როგორც არსებულ ბრენდულ სასტუმროებს შერატონს, ჰილტონსა და რედისონს, ასევე ქალაქში არსებულ სხვა მაღალი კლასისა და დაბალბიუჯეტიან სასტუმროებს.

შეგახსენებთ, რომ Maroon 5 ბათუმში სამთავრობო პროექტის „Check in Georgia“-ს ფარგლებში ჩამოდის. თავის მხრივ კი „Check in Georgia“ არის პროექტი, რომელიც ქვეყანას მნიშვნელოვან ეკონომიკურ სარგებელს, მოსახლეობას კი, მეტ შემოსავალს მოუტანს.