ვაშლიჯვრის დასახლებაში, გოძიაშვილის პირველ ჩიხში უახლოეს დღეებში სანიაღვრე სისტემის მოწყობის სამუშაოები დაიწყება - ეს გადაწყვეტილება საბურთალოს რაიონის გამგებელმა ბექა მიქაუტაძემ დღეს ამ ქუჩის მცხოვრებლებს პირადად გააცნო. გამგებლის თქმით, ასევე მიღწეულია შეთანხმება კომპანია „ჯივიპისთან“ ამავე ქუჩაზე წყლის სისტემის სრული რეაბილიტაციის შესახებ და მზად არის პროექტი, რომელიც სანიაღვრე სისტემის პარალელურად განხორციელდება.

ადგილობრივი მოსახლეობა სიახლეს დადებითაც შეხვდა, რადგან მათი განცხადებით, ამორტიზებული სასმელი წყლის სისტემა მათთვის უმძიმესი პრობლემაა, რადგან მილები მუდმივად ზიანდება, ქუჩაზე მოედინება ნიაღვრები, ლოკალური პრობლემის გამო სისტემიდან ითიშება მთელი დასახლება და შესაბამისად, სისტემის რეაბილიტაცია მათთვის დიდი კომფორტი იქნება.

„უკვე გამოვლენილია კომპანია, რომელიც ამ ქუჩაზე სანიაღვრე ქსელს მოაწყობს და სამუშაოები ამ დღეებში დაიწყება. სანიაღვრე ქსელის მოწყობისა და სასმელი წყლის სისტემის რეაბილიტაციის გარეშე ქუჩაზე საგზაო ინფრასტრუქტურის პროექტს ვერ განვახორციელებთ, რადგან დაზიანებული მიწისქვეშა კომუნიკაცია გაკეთებულ გზას აუცილებლად დააზიანებს. ამ ორი უმთავრესი პრობლემის მოგვარების შემდეგ უკვე შესაძლებელი გახდება საგზაო პროექტზე მუშაობაც,“ - განაცხადა ბექა მიქაუტაძემ.

სანიაღვრე სისტემის მოწყობაზე გოძიაშვილის პირველ ჩიხში კომპანია „დარი“ იმუშავებს.