მაგდა პაპიძის ადვოკატის მარიკა ფხალაძის განცხადებით, ბრალდებული ყველაზე მეტადაა დაზარალებული, რადგან მას მოუკლეს ქმარი და შვილი. თბილისის საქალაქო სასამართლოში ნაფიცი მსაჯულების წინაშე შესავალი სიტყვით გამოსვლისას მან განაცხადა, რომ პაპიძე იყო არაჩვეულებრივი, იდეალური დედა.
„მაგდა პაპიძე არის ყველაზე მეტად დაზარალებული იმიტომ, რომ მას მოუკლეს ქმარი და შვილი. ეს არის მისთვის ყველაზე დიდი ტრაგედია და დღეს თუ მაგდა პაპიძე ცდილობს თავის გამართლებას იმიტომ, რომ მას არ დაერქვას საკუთარი შვილისა და მეუღლის მკვლელი. ფაქტობრივად, მისთვის ცხოვრება დამთავრებულია“, - განაცხადა ადვოკატმა.
მისივე თქმით, ბრალდებაში არის მითითებული, რომ პაპიძემ მეუღლეზე განაწყენებულმა მოკლა ქმარ-შვილი. „ბრალდებაში მითითებულია, რომ მეუღლეზე განაწყენებულმა ქმარი და შვილი მოკლა. დღეს ბრალდებას ამაზე არ უსაუბრია. დღეს ბრალდებამ აბსოლუტურად სხვა ვერსია შემოგთავაზათ. იყო იდეალური ქმარი, მაგდამ სხვა მამაკაცთან გადაწყვიტა ცხოვრების დაწყებაო“, - განაცხადა ადვოკატმა.
რაც შეეხება ბრალდების მიერ წარდგენილ ჩანაწერს, სადაც პროკურატურის მტკიცებით, არის გეგმა, თუ როგორ უნდა მოეკლა პაპიძეს ქმარი და შვილი, ადვოკატმა განაცხადა, რომ ეს ჩანაწერი გამოძიების მიერ დაახლოებით 2 კვირის შემდეგაა მოპოვებული. როდესაც დამნაშავე ცდილობს კვალის დაფარვას, ის, ადვოკატის თქმით, არ აკეთებს ჩანაწერებს და არ ტოვებს შემთხვევის ადგილზე.