"ნაციონალური მოძრაობის" ლიდერმა, დავით ბაქრაძემ ჭიათურაში მაჟორიტარობის კანდიდატად გოგი ჩიქვილაძე წარადგინა და განაცხადა, რომ ოქტომბერში გამარჯვების შემდეგ ჭიათურისთვის ბევრ რამეს გააკეთებს.

"ოქტომბერში გამარჯვების შემდეგ, ის ჭათურისთვის ბევრს გააკეთებს. წლების წინ სიტუაცია სხვანაირად იყო. "ქართული ოცნება" დადიოდა რეგიონებში და ამბობდნენ, რომ როგორც საჩხერეს, ისე ავაყვავებთ ჭიათურასო. მაგრამ ვხედავთ, რა როგორაა. იმის მაგივრად, რომ წინ წასულიყო ქვეყანა, ყველაფერი უკან წავიდა. დღეს გაჭირვებაზე და პრობლემაზე რომ ისაუბრონ, საუბრობენ იმაზე, რომ ყველაფერი კარგადაა. გამოდის ივანიშვილი და ამბობს, რომ კიდევ 15 წელი დასჭირდება ყველაფერს, ასეთი მთავრობის ხელში კი, 150 წელი დასჭირდება", - განაცხადა დავით ბაქრაძემ.

მისი თქმით, პარტიის ამოცანა ქვეყნისა და ხალხის გამარჯვებაა.

"ჩვენი ამოცანაა ქვეყნის და ხალხის გამარჯვება და წინ წაყვანა. დიდი განსხვავება ხუთი წლის წინანდელ საქართველოსა და დღევანდელს შორის იცით, რა არის? ხალხს ხუთი წლის წინ იმედი ჰქონდა, რომ შეიცვლებოდა ყველაფერი. დღეს კი ვხედავთ, როგორი სიტუაციაა. აუცილებლად გვეშველება და ფეხზე დავდგებით, გამარჯვებიდან ერთ თვეში", - განაცხადა დავით ბაქრაძემ.

დღეს ჭიათურაში "ნაციონალურმა მოძრაობამ" პარტიის ახალი სახე, სოფიო სუიკაევა წარადგინა.

დავით ბაქრაძის თქმით, ის პარტიისთვის ახალ სახეს წარმოადგენს და მისთვის დიდი პატივია დღეს ამ შეხვედრაზე საზოგადოებისთვის სოფიო სუიკაევას გაცნობა.

დღეს "ნაციონალური მოძრაობა" მაჟორიტარობის კანდიდატს საჩხერეშიც წარადგენს.