იუსტიციის სამინისტროს საჯარო რეესტრის ეროვნული სააგენტოს თავმჯდომარე პაპუნა უგრეხელიძე პროექტ „რუკები მიწის მდგრადი მართვისთვის - საქართველოს ორთოფოტო"-ს მენეჯერს ელენა ბუშს შეხვდა. მხარეებმა პროექტის ფარგლებში განხორციელებული, მიმდინარე და დაგეგმილი საქმიანობები შეაფასეს, ერთ-ერთ მთავარ თემას წარმოადგენდა მაღალმთიანი ტერიტორიების აეროგადაღებაც. შეხვედრას კონტრაქტორი უკრაინული კომპანიის Aviation Accounting Centre-ს წარმომადგენელიც ესწრებოდა.

საჯარო რეესტრი ნორვეგიის კარტოგრაფიის ორგანოსთან (STATENS KARTVERK) ერთად 2015 წლის იანვრიდან პროექტს „რუკები მიწის მდგრადი მართვისთვის - საქართველოს ორთოფოტო" ახორციელებს. აღსანიშნავია, რომ მსგავსი მასშტაბის პროექტი, რომელიც  მთელი ქვეყნის ტერიტორიის აეროგადაღებას და ორთოფოტოგეგმების შექმნას გულისხმობს, საქართველოში პირველად ხორციელდება.

პროექტის შედეგად მიღებული ერთგვაროვანი და კორექტირებული ციფრული მონაცემები ხელს შეუწყობს სახელმწიფოებრივი მნიშვნელობის დარგების განვითარებასა და სწორად დაგეგმვას. საჯარო რეესტრის აეროგადაღების მასალების საბაზო ინფორმაციის სახით გამოყენებას შეძლებენ სივრცით ტერიტორიულ მოწყობასა და განვითარებასთან დაკავშირებულ პროექტებში, სამშენებლო სექტორში, ენერგეტიკაში, სატრანსპორტო ქსელის, ინფრასტუქტურული სამუშაოების დაპროექტებისას და ა.შ.