პროექტ „გაიცანი საქართველო“-ს ფარგლებში ეკონომიკისა და მდგრადი განვითარების სამინისტროს ტურიზმის ეროვნულმა ადმინისტრაციამ  სხვადასხვა მედიასაშუალებების 30 წარმომადგენელისათვის პრესტური მოაწყო. სამთო კურორტების ბახმაროსა და გომის მთის მონახულების პარალელურად ჟურნალისტებმა საზღვაო კურორტი ურეკი დაათვალიერეს.  ოზურგეთის მუნიციპალიტეტის გამგებელმა მერაბ ჭანუყვაძემ სტუმრებს კურორტზე მიმდინარე მაშტაბური ინფრასტრუქტურული პროექტები გააცნო.

კურორტზე წყალმომარაგების ცენტრალიზებული სისტემა დღემდე არ არსებობდა. საქართველოს რეგიონული განვითარებისა და ინფრასტრუქტურის სამინისტროს გაერთიანებული წყალმომარაგების კომპანია ურეკში, ორ მასშტაბურ პროექტს ახორციელებს, რომელიც ურეკის წყალმომარაგებისა და კანალიზაციის სისტემის, ასევე კანალიზაციის  გამწმენდი ნაგებობის მშენებლობას ითვალისწინებს. პროექტის დასრულების შემდეგ ადგილობრივი მოსახლეობა 24 საათიანი წყალმომარაგებით იქნება უზრუნველყოფილი.

კურორტზე 4 კილომეტრიანი საგზაო მონაკვეთის მშენებლობა სრულდება.  პროექტი დაფინანსებულია რეგიონებში განსახორციელებელი პროექტების ფონდიდან. 
სამუშაოების ჯამური ღირებულება 994 000 ლარს შეადგენს.

დაბა ურეკისა და შეკვეთილის 13 კილომეტრიან საგზაო მონაკვეთზე გარე განათების სისტემის მონტაჟი მიმდინარეობს. იცვლება მწყობრიდან გამოსული ბოძები, ნათურები და სადენები. გარე განათების სისტემის სარეაბილიტაციო სამუშაოებს ოზურგეთის მუნიციპალიტეტის გამგეობა. პროექტის ღირებულება 173 000 ლარს შეადგენს.

ზაფხულის სეზონს კურორტი ურეკი ახალი დასუფთავების მანქანებით ხვდება. ურეკი-შეკვეთილის 14 კილომეტრიან სანაპირო ზოლს 12 ახალი თანამედროვე სპეც ტექნიკა მათ შორის 3 უახლესი ნაგავმზიდი ემსახურება.  დასუფთავების მანქანებს ქვიშის პლაჟზე 20 სანტიმეტრის სიღრმიდან მყარი ნარჩენების ამოღებაა შეუძლია. სანაპირო ზოლი კვირაში რამდენჯერმე სუფთავდება.  

ტურიზმის ეროვნულმა ადმინისტრაციამ  კამპანია „გაიცანი საქართველო“  2015 წელს წამოიწყო. პროექტის მიზანია საქართველოს ტურისტული პოტენციალის წარმოჩენა და შიდა ტურიზმის პოპულარიზაცია.  ერთი წლის განმავლობაში მასმედიის 200-მდე წარმომადგენელმა საქართველოს სხვადასხვა რეგიონი მოინახულა. აჭარის, სამეგრელოს, სვანეთის, სამცხე-ჯავახეთის, იმერეთის, ხევსურეთის, რაჭის და კახეთის ტურისტული პოტენციალის შესახებ მომზადდა ათეულობით სატელევიზო სიუჟეტი. ტურიზმის ეროვნული ადმინისტრაციის მომდევნო  პრესტური თუშეთსა და ზემო აჭარაში იგეგმება.