საქართველოს სახალხო დამცველის აპარატი ეროსი კიწმარიშვილის საქმის მასალების შესწავლას იწყებს. უჩა ნანუაშვილი აცხადებს, რომ ამ საქმეზე კითხვები არსებობდა, არსებობს და ალბათ იარსებებს კიდეც.

„გამომდინარე იქიდან, რომ საქმე დასრულდა, ვიწყებთ მის შესწავლას. ჩვენ დავიწყებთ საქმის მასალების შესწავლას იმასთან დაკავშირებით, რომ გავიგოთ, რამდენად იყო ეს განაჩენი დასაბუთებული. კითხვები არსებობდა, არსებობს და ალბათ იარსებებს კიდეც. მაგრამ უნდა ვნახოთ საქმის მასალები, რაზეც აქამდე წვდომა არ გვქონდა და სამის დასრულების შემდეგ გვექნება“, - განაცხადა უჩა ნანუაშვილმა.

მთავარმა პროკურატურამ ეროსი კიწმარიშვილის თვითმკვლელობამდე მიყვანის ფაქტზე დაასრულა გამოძიება.  ამის შესახებ საგამოძიებო ორგანის მიერ ოფიციალურად გუშინ გახდა ცნობილი. 

პროკურატურაში განაცხადეს, რომ ეროსი კიწმარიშვილმა თავი მოიკლა და სისხლის სამართლის საქმე შეწყვეტილია.