საქართველოს პარლამენტის ეროვნულ ბიბლიოთეკაში, პრეზიდენტის საპარლამენტო მდივნის ანა დოლიძის პირველი წიგნის „უცნობი პორტისკენ" პრეზენტაცია გაიმართა.

სადებიუტო ნაშრომში თავმოყრილია ავტორის ის ესეები, რომლებიც ბეჭდურ და ინტერნეტგამოცემებში 2006-2016 წლებში ქვეყნდებოდა. მათი უმრავლესობა დაწერილია აშშ-ში ემიგრაციაში ყოფნის დროს.

წიგნს, რომელიც საქართველოს უახლესი ისტორიის ათწლიანი პერიოდის ერთგვარ ანარეკლს წარმოადგენს, ორი მთავარი თემა აქვს - სამართლიანობა და თანასწორობა.

„ვფიქრობ, ეს წიგნი გამოხატავს ბოლო ათწლეულს. მასში მოთავსებულია ის წერილები, რომლებიც 2006 წლიდან 2016 წლამდეა გამოქვეყნებული. კრებულში აღწერილი ძირითადი თემები საზოგადოებას დღესაც ადარდებს, ესენია - თავისუფლება, სამართლიანობა, თანასწორობა. აქედან გამომდინარე, ვიმედოვნებ, რომ ამ საკითხებზე საზოგადოებაში კვლავაც იქნება მრავალი საინტერესო დისკუსია", - განაცხადა ანა დოლიძემ.

წიგნის პრეზენტაციას საქართველოს პრეზიდენტის ადმინისტრაციის უფროსი გიორგი აბაშიშვილი, ასევე პოლიტიკური და საზოგადოებრივი სპექტრის სხვა წარმომადგენლებიც ესწრებოდნენ.