არ მაქვს საფუძველი, რომ GFK-ს კვლევებს ვენდო ან უნდობლობა გამოვუცხადო, - ამის შესახებ „თავისუფალი დემოკრატების“ ლიდერმა, ირაკლი ალასანიამ ჟურნალისტებს იმ კითხვის პასუხად განუცხადა, რომლის მიხედვითაც, GFK-ს კვლევისთვის საველე სამუშაოები ლევან თარხნიშვილის მეუღლის კომპანიამ ჩაატარა.

„ეს კვლევები ჩემში დიდ სანდოობას არ იწვევს. მე არა მაქვს საფუძველი ამ კვლევებს  ვენდო ან უნდობლობა გამოვუცხადო. ჩემთვის მთავარია, რომ საზოგადოებას ახსოვდეს - მთავარი განმსაზღვრელი არის ის აზრი, რომელიც დაფიქსირდება არჩევნების დღეს“, - განაცხადა ირაკლი ალასანიამ.

პარტიის ლიდერმა 2010 წელს ჩატარებული კვლევების შესახებაც ისაუბრა.

„მინდა, გავიხსენო, რომ 2010 წელს სწორედ კვლევებმა, არჩევნებამდე 4 თვით ადრე 7% დაგვიწერა და სამჯერ მეტი ავიღეთ. კვლევები არ უნდა ტარდებოდეს იმიტომ, რომ შემდეგ მოლოდინი გავაჩინოთ. ყველა აკეთებს კვლევას, მერე ივანიშვილ-ბიგვავამ გამოაცხადეს კვლევები. ეს სერიოზულ კითხვებს აჩენს. ამ კვლევებშიც ძირითადი ტენდენციები იყო სწორი - მოსახლეობის უმეტესობას არ უნდა, გააგრძელოს ცხოვრება ისე, როგორიც არის „ქართული ოცნების“ ხელისუფლების დროს, მაგრამ არ უნდათ დაბრუნება „ნაციონალური მოძრაობის“ დროინდელ სასტიკ ძალადობრივ რეჟიმში. ამიტომ „თავისუფალ დემოკრატებს“ გვაქვს ყველაზე მაღალი შანსი, ეს გადაუწყვეტელი ამომრჩეველი ჩვენსკენ გადმოვხაროთ“, - განაცხადა ირაკლი ალასანიამ.