იანვარ-ივნისის აჭარის რესპუბლიკური ბიუჯეტი 11,3%-იანი, ხოლო ნაერთი ბიუჯეტი 17,4 %-იანი გადაჭარბებით შესრულდა.

როგორც აჭარის ფინანსთა და ეკონომიკის სამინისტროში განმარტავენ, 2016 წლის ექვსი თვის მონაცემებით, აჭარის რესპუბლიკური ბიუჯეტის გეგმა 71 მლნ 820 ათას 500 ლარი იყო, თუმცა საანგარიშო პერიოდში შესრულებამ 79 მლნ 950 ათას 600 ლარი შეადგინა, შესაბამისად  გეგმა 111,3 %-ით შესრულდა.

სტატისტიკური ინფორმაციის მიხედვითვე, იანვარ-ივნისის რესპუბლიკური ბიუჯეტის გადასახადების მუხლი 108,8 %-ითაა შესრულებული, სხვა შემოსავლების მუხლი კი 171,7 %-ით. არაფინანსური აქტივების (კლება) მუხლი  1-ელი ივლისის მდგომარეობით, მხოლოდ 94,7 %-ითაა შესრულებული.

რაც შეეხება იანვარ-ივნისში აჭარის ნაერთი ბიუჯეტის შესრულების მაჩვენებლებს, გეგმა  115 მლნ 640 ათას 500 ლარი იყო, ხოლო შესრულებამ 135 მლნ 705 ათას 300 ლარს მიაღწია, ანუ გეგმა 117,4 %-ით შესრულდა.

1-ელი ივლისის მდგომარეობით, იანვარ-ივნისის აჭარის ნაერთი ბიუჯეტის გადასახადების მუხლი 116,6 %-ით, სხვა შემოსავლების მუხლი - 118,5 %-ით,  ხოლო არაფინანსური აქტივების (კლება) მუხლი  124,4 %-ითაა შესრულებული.

აჭარაში საკმაოდ საინტერესო სტატისტიკაა მუნიციპალური ბიუჯეტების შესრულების კუთხით. უფრო კონკრეტულად, იანვარ-ივნისში ხულოს მუნიციპალური ბიუჯეტი 651,7 %-ით,  შესრულდა, შუახევის მუნიციპალური ბიუჯეტი კი 506,9 %-ით. საანგარიშო პერიოდში ხელვაჩაურის მუნიციპალური ბიუჯეტი 198,8 %-ით, ქობულეთის მუნიციპალური ბიუჯეტი - 161,1 %-ით, ხოლო ბათუმის თვითმმართველი ერთეულის ბიუჯეტი 111,5 %-ით შესრულდა. სამაგიეროდ გარღვევაა ქედას მუნიციპალურ ბიუჯეტში, რომელიც იანვარ-ივნისის მდგომარეობით მხოლოდ 62,2 %-ით შესრულდა.