14-15 ივლისს ბათუმი საერთაშორისო კონფერენციას უმასპინძლებს
14-15 ივლისს ბათუმში, სასტუმროში „ჰილტონი“, ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის ორგანიზებით გაიმართება ტრადიციული, მე-13 საერთაშორისო კონფერენცია „საქართველოს ევროპული გზა - სტაბილურობის, განვითარებისა და მრავალფეროვნების კავშირი.”
წელს კონფერენცია მიეძღვნება ევროპულ დღის წესრიგში არსებულ ისეთ საკითხებს, როგორიცაა: თანამედროვე ევროპული უსაფრთხოების მთავარი გამოწვევები, ევროკავშირსა და პარტნიორ ქვეყნებს შორის ევროპული ინტეგრაცია და თანამშრომლობის ახალი ფორმები, რეგიონის როლი ევროპის ენერგო-უსაფრთხოებაში, ეკონომიკური განვითარება და სტაბილურობა.
კონფერენციაში მონაწილეობას მიიღებენ საქართველოს აღმასრულებელი და საკანონმდებლო ხელისუფლების, ევროკავშირის წევრი ქვეყნების, ევროკავშირის ინსტიტუტებისა და პარტნიორი ქვეყნების მაღალი რანგის ოფიციალური პირები, მათ შორის, სამოქალაქო საზოგადოებისა და ბიზნეს-სექტორის წარმომადგენლები. ღონისძიებას გააშუქებს საერთაშორისო და ადგილობრივი მედია.
