სპილო “გრანდი“ 21 წლის გახდა.“ჩვენი სპილო გრანდი იუბილარია. 21 წლის გახდა. თავქარიანი თინეიჯერი აღარაა. დაღვინებული და სერიოზული ახალგაზრდა ყმაწვილია უკვე. დაოჯახებული რომაა, კი იცით. მშვენიერი მალკა უმშვენებს გვერდს. ახლა ჩვენი უმთავრესი საზრუნავი მათი გამრავლებაა. შვილიშვილის ყოლის სურვილით გულანთებული ბებია-ბაბუა რომ ოცნებობს, ნეტავ მალე დადგეს ის დღე, როცა ერთ ბავშვს ჩაგვიგორებენ კალთაშიო, ისე ვართ ჩვენც. ცოტა ხნის წინ გრანდს გამრავლების პერიოდი ჰქონდა და გაფაციცებულები ვადევნებდით თვალყურს მათ ყოველდღიურობას. ვითვლიდით დღეში რამდენჯერ, როგორ, რა ვითარებაში და რა ინტენსიურობით სიყვარულობდნენ. თუ ვინმე შეუსწრებდა ცოლ-ქმრული მოვალეობების შესრულებისას, მაშინვე მთელ ზოოპარკს ახარებდა-ხოლმე, არიქა, დავინახე, დავინახეო. ასე რომ, ახლა მოლოდინის რეჟიმში ვართ. ანუ, პატარას კი არ ველოდებით, ჯერ იმის გაგებას ველოდებით, ველოდებით თუ არა პატარას.

ჰოოოოდა, ისღა დაგვრჩენია, მივულოცოთ დაბადების დღე იუბილარს და გამრავლება ვუსურვოთ მას და მის მომხიბლავ მეუღლეს”, წერს თბილისის ზოოპარკის ადმინისტრაცია Facebook-ის გვერდზე.