''ირაკლი ალსანია - თავისუფალი დემოკრატების'' აღმასრულებელმა მდივანმა თამარ კეკენაძემ სააპელაციო სასამართლოში სარჩელი შეიტანა. სარჩელის შინაარსი უცველელია და უკავშირდება 5 აგვისტოს ,,თავისუფალი დემოკრატების" მიერ 12 სხვა ოპოზიციურ ძალასთან ერთად საქალაქო სასამართლოში რეკლამის შესყიდვის წესის შესახებ  შეტანილ სარჩელს. სარჩელი ორი ძირითადი ნაწილისაგან შედგებოდა: ერთის მხრივ მოთხოვნა იყო იმ ნორმების გაუქმება, რის მიხედვითაც ახლებურად დარეგულირდა პოლიტიკური რეკლამის შესყიდვის წესი და მეორე მხრივ თავისუფალი დემოკრატები მოითხოვდნენ სარჩელის უზრუნველსაყოფად ამ აქტის მოქმედების შეჩერებას.  

სასამართლომ სარჩელი მიიღო წარმოებაში, თუმცა მეორე მოთხოვნა - შეჩერებულიყო ამ აქტის მოქმედება სარჩელის უზრუნველსაყოფად არ იქნა დაკმაყოფილებული. ამ გარემოების გათვალისწინებით თამარ კეკენაძემ შეიტანა სარჩელი ახლა უკვე სააპელაციო სასამართლოში მოთხოვნით - შეჩერდეს აქტის მოქმედება სარჩელის უზრუნველსაყოფად.

,,თავისუფალი დემოკრატების" აღმასრულებელი მდივნის, თამარ კეკენაძის აზრით ასეთი უხეში რეგულაციები სარეკლამო დროის შესყიდვასთან დაკავშირებით საარჩევნო გარემოზე უარყოფითად აისახება. ,,დიდია ალბათობა ეს ყოფილიყო შეგნებული და გამიზნული ნაბიჯი იმისათვის, რომ პარტიებს შეგვეზღუდოს თავისუფლად  განვახორციელოთ  კანონიერი უფლება ვიმოქმედოთ ისე,  როგორც საჭიროდ ჩავთვლით რეკლამის მიმწოდებლებთან მიმართებაში. ამასთანავე, აუდიტს არ აქვს უფლება რაიმე სახით ჩაერიოს პარტიასა და კერძო სუბიექტს შორის ურთიერთობაში და განსაზღვროსრეკლამის შესყიდვის წესი, რადგან აღნიშნული მდგომარეობა პარტიებს აყენებს არათანაბარ მდგომარეობაში ხელისუფლების პოლიტიკურ ძალასთან", - განაცხადა თამარ კეკენაძემ.