ქართველი მსახიობი კახა კინწურაშვილი ახალ საერთაშორისო კინოპროექტში ერთ-ერთ მთავარ როლს შეასრულებს. საუბარია უნგრელი რეჟისორის, კორნელ მუნდრუცოს ისტორიულ დრამაზე The Revolution According to Kamo.

გადაღებების მნიშვნელოვანი ნაწილი საქართველოში გაიმართება. კინწურაშვილთან ერთად ფილმში სხვა ქართველი მსახიობებიც მონაწილეობენ. „რევოლუცია კამოს მიხედვით“ კორნელ მუნდრუცოს ახალი ნამუშევარია. უნგრელი კინორეჟისორი ფართოდ არის ცნობილი ფილმებით Pieces of a Woman და  White God.

სცენარის ავტორია პაველ პავლიკოვსკი, რომლის ფილმმა „იდა“ „ოსკარი“ მოიპოვა. რეჟისორი ასევე ცნობილია ფილმით „ცივი ომი“.

ფილმის მოქმედება რუსეთის იმპერიის დაშლის ფონზე ვითარდება. სიუჟეტის ცენტრშია სიმონ ტერ-პეტროსიანის, მეტსახელად კამოს, და სოსო ჯუღაშვილის, შემდგომში იოსებ სტალინის სახელით ცნობილი, მეგობრობა.

თხრობა რამდენიმე ათწლეულს მოიცავს და მთავარი გმირების ბავშვობიდან იწყება. ფილმი გვიჩვენებს, როგორ ჩაერთნენ მეგობრები რევოლუციურ საქმიანობაში და რა შედეგები მოჰყვა ამას.

კახა კინწურაშვილი თეატრისა და კინოს მსახიობია, რომელიც ცნობილია ქართულ ფილმებში შესრულებული როლებით, მათ შორის დეა კულუმბეგაშვილის ნამუშევრებში „დასაწყისი“ და „აპრილი“. საქართველოში კინწურაშვილს იცნობენ როგორც შემოქმედებითი საქმიანობით, ისე აქტიური მოქალაქეობრივი პოზიციით -ის არაერთხელ მონაწილეობდა ანტისამთავრობო და პროევროპულ საპროტესტო აქციებში.