"ერთიანი ნაციონალური მოძრაობის" ვაზისუბნის მაჟორიტარი დეპუტატობის კანდიდატმა გოგა ონიანმა ბრიფინგზე წინასაარჩევნო დარღვევებზე ისაუბრა.
''სამწუხაროდ, წინასაარჩევნო პერიოდში ქართული ოცნება დანაშაულებრივ საქმიანობას განაგრძობს. ქართული ოცნების მაჟორიტარი დეპუტატობის კანდიდატი ირაკლი აბუსერიძე მერთან და გამგებელთან ერთად ბაღებსა და სკოლებში დადის, სადაც მასწავლებლებსა და დირექტორებს მხარდაჭერას აიძულებს. ამ ყველაფერს სახელმწიფოს მიერ მოწყობილ ღონისძიებებზე აკეთებს. ეს სახელმწიფო რესურსის გამოყენებაა და ისჯება კანონით.
გარდა ამისა, გამგეობის თანამშრომელი ხვიჩა ჩალაბაშვილი, რომელიც ვაზისუბნისა და მერვე ლეგიონის მოსახლეობის პრობლემების მოგვარებით უნდა იყოს დაკავებული, ის სამედიცინო შვებულებაშია. თითქოს მას ბრონხიტი აქვს, რეალურად კი ქართული ოცნების მაჟორიტარი დეპუტატობის კანდიდატის სეირნობითა და შეხვედრების მოწყობითაა დაკავებული. ეს გაყალბებული დოკუმენტია, ეს ქმედება სისხლის სამართლის კოდექსით გათვალისწინებული დანაშაულია.
ამ შემთხვევაში შეგვეძლო კანდიდატის რეგისტრაციიდან მოხსნა მოგვეთხოვა. ჩვენ ვაზისუბნისა და მერვე ლეგიონის მოსახლეობის განწყობა ვიცით. 8 ოქტომბერს ხელისუფლების სხვა შტოებთან ერთად ირაკლი აბუსერიძე და ქართული ოცნება ვაზისუბანში მწარედ დამარცხდება'' - განაცხადა გოგა ონიანმა.