ექს-პრემიერ ბიძინა ივანიშვილის განცხადებით, კოაბიტაციაზე ბევრი საყვედური ისმის, მაგრამ ეს ერთადერთი სწორი გზა და სწორი პროცესი იყო.
მისივე თქმით, „ოცნებამ“ ჯოჯოხეთისკენ მიმავალი ქვეყანა უკან შემოატრიალა. ,,მათ უზარმაზარი ფინანსური რესურსი ჰქონდათ, ნაძარცვი. 46 დეპუტატი ჰყავდათ, მათი პრეზიდენტი ერთი წელიწადი იყო, სასამართლოში კუბლაშვილი იყო. პროკურატურა მსხვერპლად ჰყავდათ“, - აღნიშნა ივანიშვილმა.
ყოფილი პრემიერის ცნობით, ნაციონალებს გარედან არანაირი მხარდაჭერა არ აქვთ. მათ შორის, ამერიკიდან.
„საზოგადოებას ახლა ვპირდები, რომ ისინი ახლა მიიღებენ იმ საჩუქარს, რასაც ოთხი წლის მანძილზე ელოდნენ. ეს საჩუქარი იქნება ის, რასაც 2012 წელს ელოდნენ, ახლა მიიღებენ. „ნაციონალები“ ვეღარ „იბლატავებენ“, თავიანთი ადგილი ექნებათ. მათი სახე ყველამ ნახა და მათი პირადი მხარდაჭერა განულებულია. „ნაციონალების“ ადგილი იქნება იქ, სადაც ეკუთვნით. პარლამენტში 5-10 კაცი ეყოლებათ და „ცუციკებივით დასხდებიან“, - დასძინა ივანიშვილმა.

მისივე თქმით, ,,ნაციონალურ მოძრაობაში” საკუთარი თავის საცემადაც მზად არიან, რათა აჩვენონ, რომ ეს ხელისუფლება მსგავსია წინა ხელისუფლების.

”გოგონები სცემეს ამას წინ და ”ნაციონალური მოძრაობის” წევრებზე იკვეთება ეს დანაშაული. ეს მათი ხელწერაა და სულ არ გამიკვირდება. ისევე როგორც კორცხელი, ამდენი იძახეს, მათი დადმული სცენარი იყო, ტყუილად არ უპოვნიათ მათ მანქანაში ხელკეტები. იქაც თვითონ ძალადობდნენ. საკუთარი თავის საცემადაც მზად არიან, რათა აჩვენონ, რომ ეს ხელისუფლება მსგავსია წინა ხელისუფლების”, - განაცხადა ივანიშვილმა.