"ერთიანი ნაციონალური მოძრაობის" საგარეჯოს მაჟორიტარი დეპუტატობის კანდიდატმა ზურაბ ჭიაბერაშვილმა გუშინ საღამოს მომხდარ ტერაქტთან დაკავშირებით განცხადება გააკეთა.
‘’ინგოროყვას კლინიკაში დაშავებული დავით კუხალაშვილი იმყოფება, რომლის ჯანმრთელობის მდგომარეობა უმძიმესია. ექიმები მისი სიცოცხლის გადარჩენას ცდილობენ.
ჩვენი პოლიტიკური შეფასებით გუშინ საღამოს, არჩევნებამდე სამი დღით ადრე მომხდარ ტერორისტულ აქტთან დაკავშირებით პასუხისმგებლობა ხელისუფლებას ეკისრება.
ხელისუფლება უმძიმეს კრიმინალურ ფონზეა პასუხიმგებელი, რომელიც ქვეყანაში ბოლო 4 წელია. ეს ყველაფერი მკვლელობებით, ძალადობითა და დაუსჯელობის სინდრომით შეიქმნა. არცერთი სერიოზული საქმე არ არის გამოძიებული. სწორედ ასეთ პირობებში, როდესაც მთელი სამართალდამცავი სტრუქტურები მოშლილია, ტერორისტული აქტი ხდება, რომელიც შევარდნაძის პერიოდს, 90-იან წლებს გვახსენებს.
ბოლო ერთი წლის განმავლობაში საშინელი ფაქტები მოხდა. გავიხსენებ ოპოზიციონერ ბუკა პეტრიაშვილზე თავდასხმას, კორცხელის ინციდენტსა და ერთი კვირის წინ გორში ირაკლი ოქრუაშვილზე თავდასხმას, მას პირდაპირ ესროლეს წინასაარჩევნო შეხვედრაზე.
ამ ყველაფერზე ხელისუფლების რეაქცია ერთ რამეზე მიუთითებს, ბიძინა ივანიშვილს პირადად და მის მარიონეტებს კვირიკაშვილს, კალაძეს და სხვებს აწყობთ ის ქაოსი, დაპირისპირება და არეულობა, რისკენაც ისინი მიგვაქანებენ, რაც აუცილებლად 8 ოქტომბერს უნდა შევაჩეროთ.
ხელისუფლებას თავისი ჩამოყალიბებული გეგმა აქვს, რა უნდა მოხდეს ქვეყანაში, როგორი განწყობები უნდა შექმნან, რომ ტერაქტებით, ძალადობითა და არეულობებით ხელისუფლება შეინარჩუნონ, რასაც ისინი ბუნებრივია ვერ შეძლებენ.