ნიუ-იორკის შტატში მალე პოლიცია საზოგადოებრივი თავშეყრის ადგილებში მარიხუანის მოხმარებისთვის მოქალაქეებს აღარ დააპატიმრებს. ამის ნაცვლად, სამართლადამცველები წესრიგის დამრღვევებს სასამართლო უწყებას გადასცემენ. ამის შესახებ CNN-ი იუწყება.

„შტატში მარიხუანის გამოყენება რეკრეაციული მიზნებისთვის მალე ლეგალური გახდება. აუცილებელია, ამისთვის ჩვენი მოქალაქეების მომზადება“, - განაცხადა ნიუ-იორკის მერმა ბილ დე ბლაზიომ.

ნიუ-იორკის პოლიციის დეპარტამენტმა მარიხუანის მოხმარებისა და შენახვისთვის დასჯის სისტემის გადახედვაზე მუშაობა უკვე დაიწყო. პროექტი მერს 30 დღეში წარედგინება.

CNN-ის ინფორმაციით, საზოგადოებრივ ადგილებში მარიხუანის მომხარებასთან დაკავშირებული ნებისმიერი ცვლილება ძალაში წლის ბოლომდე შევა. ამჟამად მარიხუანის მოხმარებისთვის ნიუ-იორკის მცხოვრებლებს პატიმრობა ემუქრებათ. მათ ვისაც მარიხუანის შენახვაში ამხილებენ, მოქმედი კანონმდებლობით სასამრთლო უწყებას გადასცემენ.