ჩემი მეთვალყურეობის ქვეშ უნდა წავიდეს ეს გამოძიება, რათა ყველა პოლიციელი იყოს დასჯილი. როგორც კი საჭიროება მოითხოვს აქციაზე ჩემ დაბრუნებას, მივატოვებ ყველაფერს და მაშინვე წავალ, - განაცხადა ჟურნალისტებთან, ხორავას ქუჩაზე მოკლული დავით სარალიძის მამამ, ზაზა სარალიძემ. 

მისი განმარტებით, სიმართლეს არ შეესაბამება ინფორმაცია, რომ ის თითქოს, შს მინისტრის მოადგილეს, გიორგი საბანაძეს შეხვდა.

"სოლიდარობის აქციები გაგრძელდება. შეძლებისდაგვარად, თავისუფალი როცა ვიქნები, აუცილებლად შევუერთდები ნებისმიერ ადგილზე. პოლიტიკოსებმა კი არა, მთელმა საქართველომ უნდა გააგრძელოს ეს აქციები. ამაზე საუბარი უკვე მეტისმეტია. მე გამაპოლიტიზირეს, თითქოს პოლიტიკურ მოთხოვნებს ვაყენებდი და გახარიას მოქმედება არ იყო გადაცდომა? პირდაპირ მშვიდობიან მოქალაქეებზე რომ დაიწყო ზეწოლა. გამოაცხადეს ტერორისტები შემოსულანო. ტერორისტები როგორ მოვიდნენ იმ აქციაზე, ამაზე პასუხს რატომ არ სცემენ? გუშინ უთქვამს საბანაძეს შს მინისტრის მოადგილეს, რომ თურმე მე შემხვედრია და განმიმარტა სამართლებრივად კარვების აღება და მე დავთანხმებულვარ. სად შემხვდა? სად დამირეკა? რა სისულელეს ლაპარაკობს ეს ხალხი? აღარ მოსწყინდათ ტყუილები?!", - აცხადებს სარალიძე. 

ის ამ წუთებში შსს-ს გენინსპექციაში იმყოფება, ის სასმართლოში მომხდარ ინციდენტში მონაწილე სამართალდამცავების დასჯას მოითხოვს.