ჩვენ ვცხოვრობთ ურთულეს დროს, როცა ეკლესია არის დიდ გასაჭირში, მაგრამ ბჭენი ჯოჯოხეთისანი ვერ მოერევიან მას, - ამის შესახებ საქართველოს კათოლიკოს-პატრიარქმა, ილია მეორემ სამების საკათედრო ტაძარში ქადაგებისას განაცხადა.

„ეს არის უდიდესი დღე. ამ დღის სახელზე მრავალი ტაძარია აშენებული. ერთი მათგანი მთიულეთშია, ჩირიხში, კობაიძეების სოფელში. უფალი ბრძანებს „აღვაშენო ეკლესიაი ჩემი და ბჭენი ჯოჯოხეთისანი ვერ ერეოდენ მას“. ჩვენ ვცხოვრობთ ურთულეს დროში, როცა ეკლესია არის დიდ გასაჭირში, მაგრამ ბჭენი ჯოჯოხეთისანი ვერ მოერევიან მას. უფალი ჩვენც მოგვმართავს: მიიღეთ სულიწმინდა. მზად უნდა ვიყოთ სულიწმინდის მისაღებად. თომა მოციქულსაც სწამდა, რომ მაცხოვარი ნამდვილად გამოეცხადა, მაგრამ გული შესტკიოდა იმიტომ, რომ ის არ იყო მოციქულებთან და ის თავისი სიტყვებით აიძულებდა უფალს, მეც გამომეცხადეო. რვა დღის შემდეგ გამოეცხადა უფალი მას. ჩვენ ვცხოვრობთ ისეთ დროს, როცა უფალი ახლოსაა ჩვენთან, უფალი ჩვენთანაა და ჩვენ მადლობას ვსწირავთ უფალს", - თქვა პატრიარქმა და ხელისუფლება, სამღვდელოება და ხალხი დალოცა.

"მე მინდა დავლოცო ჩვენი ხელისუფლება, ჩვენი სამღვდელოება, ჩვენი ხალხი, რათა ყველაფერს აკეთებენ იმისათვის, რომ უფალი ჩვენთან იყოს, სხვაგან არა არის ამისი საშუალება. კიდევ მნიშვნელოვანი არის იმით კვირაცხოვლობა, რომ კვირაცხოვლობის დღეს მსოფლიო პატრიარქმა გადმოგვცა ჩვენ სიგელი, რომ ის ცნობს საქართველოს ეკლესიის ავტოკეფალიას. მე მინდა მადლობა შევწირო უფალს და მსოფლიო პატრიარქს ეკლესიას კონსტანტინეპოლისას ამდენი წყალობისათვის", - განაცხადა პატრიარქმა.