ნიუ იორკის შტატში, ბოლო 24 საათში კორონავირუსით 226 ადამიანი გარდაიცვალა. წინა 24 საათში 280 ინფიცირებული დაიღუპა. ამის შესახებ შტატის გუბერნატორმა ენდრიუ კუომომ პრესკონფერენციაზე განაცხადა.

ნიუ იორკის შტატი აშშ-ში ეპიდემიის ეპიცენტრს წარმოადგენს.

გუბერნატორის თქმით, ჰოსპიტალიზირებულთა საერთო რაოდენობა იკლებს, მათი რიცხვი დღეისათვის 9 647-ს შეადგენს. წინა დღეს ჰოსპიტალიზირებული იყო 717 ადამიანი, მანამდე კი 780.

“რიცხვი, რომელიც მოსვენებას არ მაძლევს, ჯერ კიდევ არ იკლებს ისე, როგორც ჩვენ გვსურს. გუშინ 226 ნიუიორკელი გარდაიცვალა“, - აღნიშნა კუომომ.

მის მიერ მოყვანილი მონაცემებით, 2 მაისს გარდაიცვალა 280 ადამიანი, 1 მაისს - 299, 30 აპრილს - 289, 29 აპრილს - 306, 28 აპრილს - 330, 27 აპრილს - 335, 26 აპრილს - 337, 25 აპრილს - 367, 24 აპრილს - 437. ყველაზე მძიმე დღეებში 24 საათში გარდაცვლილთა რაოდენობა 700-ს აჭარბებდა. ხელისუფლების მონაცემებით, შტატში დღეის მონაცემებით გარდაცვლილია 19 189 ადამიანი.