ესპანეთში ყველაზე ხანდაზმული ადამიანი 113 წლის მარია ბრანიასი კორონავირუსისგან გამოჯანმრთელდა. ინფორმაციას მისი ნათესავი Twitter-ში ავრცელებს.

მარია ბოლო 20 წელია ჟირონის პროვინციაში მდებარე  მოხუცებულთა თავშესაფარში ცხოვრობს. აპრილში მას კორონავირუსი დაუდასტურდა. დაავადება მსუბუქ ფორმებში მიმდინარეობდა. მაისის დასაწყისში ექიმებმა განაცხადეს, რომ მარია სრულად განიკურნა.   

ავადმყოფობის პერიოდში ის თავის ოთახში, იზოლაციაი იმყოფებოდა და მუდმივად ეკონტაქტებოდა თავისი ოჯახის წევრებს ტელეფონით.

ხანდაზმულთა თავშესაფარში, სადაც მარია ცხოვრობს, კორონავირუსმა რამდენიმე ბენეფიციარი იმსხვერპლა.

2019 წლიდან მარია ბრანიასი ესპანეთში ყველაზე ხანდაზმულად მიიჩნევა. ის 1907 წელს დაიბადა ესპანელი ემიგრანტების ოჯახში ამერიკის ქალაქ სან ფრანცისკოში. რამდენიმე ხნის შემდეგ ის ესპანეთში დაბრუნდა. 1931 წელს მარია გათხოვდა. მას სამი შვილი, 11 შვილიშვილი და 13 შვილთაშვილი ჰყავს. თავისი სიცოცხლის განმავლობაში მარიამ გადაიტანა ესპანური გრიპი 1918 წელს და სამოქალაქო ომი 1936-1939 წლებში.