ეგვიპტელი ექიმები კორონავირუსით ინფიცირებული პაციენტების სამკურნალოდ დექსამეტაზონს ჯერ კიდევ მანამდე იყენებდნენ, ვიდრე დიდი ბრიტანეთი აღნიშნულ წამლის რეგისტრაციის შესახებ განაცხადებდა. ამის შესახებ ეგვიპტის კორონავირუსთან ბრძოლის სამეცნიერო კომიტეტის ხელმძღვანელმა ჰუსამ ჰოსნიმ განაცხადა.

 „დიდმა ბრიტანეთმა მედიასაშუალებებით  წარმატებით მოახდინა ამ წამლის ტირაჟირება, თუმცა ეგვიპტე მას ჯერ კიდევ ბრიტანეთამდე იყენებდა“, - განაცხადა ჰოსნიმ ტელეარხ Sada el-Balad-ის ეთერში.

ჰოსნის თქმით, აღნიშნული წამალი გამოიყენება კორონავირუსით ინფიცირებული საშუალო და მძიმე დაავადების მქონე პაციენტებში. ამასთან, მან აღნიშნა, რომ პრეპარატის გამოყენება დაშვებულია მხოლოდ კლინიკებში ექიმების  მეთვალყურეობის ქვეშ.

ეგვიპტეში კორნავირუსით ინფიცირების 47 856 შემთხვევაა დადასტურებული, გარდაიცვალა 1 766 ადამიანი.

გუშინ, ბრიტანეთის ხელისუფლებამ დექსამეტაზონი COVID-19-ის სამკურნალოდ დაამტკიცა. ხელისუფლების განცხადებით, დექსამეტაზონი კორონავირუსისგან განსაკურნად მსოფლიოში პირველი წამალია.

 „ხელისუფლებამ დღეიდან ავტორიზება მოახდინა ჯანდაცვის ნაციონალური სამსახურის მიერ კორონავირუსის საწინააღმდეგო მსოფლიოში პირველი წამლის გამოყენებაზე, რომელსაც დამტკიცებულად შეუძლია დასწიოს გარდაცვალების რისკი... მთავრობის მიერ დაფინანსებულმა  ამ წამლის გამოცდამ,  ცხადყო, რომ ის არსებითად ამცირებს გარდაცვალების რისკს პაციენტებში, რომლებსაც სჭირდებათ ჟანგბადით მკურნალობა. ხელისუფლება აკეთებს ყველაფერს, რათა წამალი ხელმისაწვდომი იყოს ყველასთვის ჯანდაცვის ნაციონალური სამსახურის დაწესებულებებში დიდი ბრიტანეთის მთელ ტერიტორიაზე“, - ნათქვამია ქვეყნის ჯანდაცვის სამინისტროს განცხადებაში, რომელიც მედიამ გავრცელა.

ოქსფორდში ჩატარებული კვლევების თანახმად, დექსამეტაზონი 35 პროცენტით ამცირებს გარდაცვალების რისკს პაციენტებში, რომლებიც დამოკიდებულნი არიან ხელოვნური ვენტილაციის აპარატზე, ხოლო 20 პროცენტით - პაციენტებში, რომლებიც გადიან ჟანგბადით მკურნალობას. გამოცდის დროს პრეპარატი მიიღო 2 104-მა პაციენტმა 10  დღის განმავლობაში, დღეში 6 მგ-ის რაოდენობით.

დიდი ბრიტანეთი პრემიერ მინისტრმა ბორის ჯონსონმა კვლევის შედეგებს „ამ მომენტისთვის უდიდესი გარღვევა“ უწოდა კორონავირუსთან ბრძოლაში.

ჯანდაცვის სამინისტროს განცხადებით, არსებული სტეროიდების მარაგები, რომლის შეკვრაც 5 ფუნტი სტერლინგი ღირს, 200 ათასზე მეტი ადამიანის სამკურნალოდ საკმარისია.

გათვლების თანახმად, აღმოჩენა უფრო ადრე რომ გაკეთებულიყო, ბრიტანეთში 4-5 ათასი სიცოცხლის გადარჩენა შეიძლებოდა.