თურქეთის თავდაცვის მინისტრმა ჰულუსი აქარმა განაცხადა, რომ ქვეყნის შეიარაღებული ძალები მხარდაჭერას უცხადებს აზერბაიჯანს, სომხეთის საზღვარზე სამხედრო ესკალაციის ფონზე. ამასთან ის სრულ პასუხისმგებლობას სომხეთს აკისრებს.

 „სასტიკად ვგმობთ თავდასხმას სომხური მხრიდან  თოვუზის რაიონში... ვაგრძელებთ აზერბაიჯანის შეიარაღებული ძალების მხარდაჭერას სომხეთის წინააღმდეგ, რომელიც მრავალი წელია აგრესიულ პილიტიკას ატარებს და უკანონოდ აქვს ოკუპირებული აზერბაიჯანული მიწები“, - განაცხადა მინისტრმა. იუწყება სააგენტო Anadolu.

მან აღნიშნა, რომ თურქეთის შეიარაღებული ძალები აზერბაიჯანის შეიარაღებული ძალების გვერდით იქნება პრინციპ „ერთი ერი, ორი სახელმწიფოს“ შესაბამისად.

12 ივლისს დაწყებული შეიარაღებული დაპირისპირება სომხეთ-აზერბაიჯანის საზღვარზე მესამე დღეა გრძელდება.

ბაქოს ინფორმაციით, დაიღუპა 11 აზერბაიჯანელი სამხედრო, მათ შორის გენერალი.

სომხური მხარის განცხადებით, დაღუპულია ორი და დაჭრილია ხუთი სამხედრო. აზერბაიჯანი და სომხეთი ვითარების გამწვავებაში ერთმანეთს ადანაშაულებენ.