პარიზში, „შარლი ებდოს“ ყოფილ ოფისთან მომხდარ თავდასხმის საქმეზე ცხრა ადამიანია დაკავებული. ბოლოს მთავარ ეჭვმიტანილთან დაკავშირებული კიდევ ორი ადამიანი დააკავეს.

სააგენტო „ფრანს პრესის“ ცნობით, მთავარი ეჭვმიტანილის უმცროსი ძმა, პაკისტანელი, ქალაქ ვალ-დუაზში აიყვანეს. სამართალდამცველებმა ასევე დააკავეს მამაკაცი, რომელიც სავარაუდო თავდამსხმელის გარემოცვას ეკუთვნოდა.

საერთო ჯამში დაკავებულია ცხრა ადამიანი: ბოლო ორი დაკავებულის გარდა, დაპატიმრებულია მთავარი ეჭვმიტანილი, ხუთი მამაკაცი, რომლებიც თავდასხმის დღეს თავდამსხელის ერთ-ერთ სახლში იმყოფებოდნენ და მისი ყოფილი მეზობელი.

თავდასხმა პარასკევს, 25 სექტემბერს პარიზის მე-11 ოლქში მოხდა, იქ სადაც ადრე სატირული ჟურნალის „შარლი ებდოს“ ოფისი მდებარეობდა. თავდასხმელმა ცივი იარაღით დაჭრა ორი ადამიანი. საფრანგთის შს მინისტრმა ჟერალდ დარმანენმა მომხდარს „ისლამისტური ტერორიზმის აქტი“ უწოდა.

ფრანგული მედიის ინფორმაციით, ძირითადმა ეჭვმიტანილმა -  18 წლის პაკისტანელმა დანაშაული აღიარა და განაცხადა, რომ სურდა „შარლი ებდოს“ ჟურნალისტების მოკვლა, მოციქულ მუჰამედის კარიკატურის დაბეჭდვის გამო.

რედაქციაზე თავდასხმა 2015 წელს მოხდა. მანამდე ჟურნალის ყდაზე მუჰამედის კარიკატურები დაიბეჭდა. 2015 წელს ჯიჰადისტმა ძმებმა შეიარაღებული თავდასხმისას რედაქციის 12 თანამშრომელი დახოცეს, მათ შორის გამოცემის 5 მთავარი კარიკატურისტი.

დღეს შარლი ებდოს რედაქცია გასაიდუმლოებულ შენობაში იმყოფება.