ყარაბაღის კონფლიქტის ზონაში, შეხების ხაზზე საომარი მოქმედებები გრძელდება. მხარეები ურთიერთგამომრიცხავ განცხადებებს აკეთებენ. სომხეთის თავდაცვის სამინისტროს პრესმდივან შუშან სტეპანიანის ინფორმაციით, სომხურმა დანაყოფებმა რამდენიმე მიმართულებით მოიგერიეს აზერბაიჯანის შეიარაღებული ძალების იერიში და მოწინააღმდეგის ცოცხალ ძალას და ტექნიკას მნიშვნელოვანი დანაკარგი მიაყენეს. მისივე ინფორმაციით, სამხრეთის მიმართულებით განადგურებულია აზერბაიჯანის ჯავშანტექნიკა.

მთიანი ყარაბაღის თვითაღიარებული რესპუბლიკის პრეზიდენტმა, არაიკ არუთუნიანმა განაცხადა, რომ ამ ეტაპზე კომპრომისისა და ცეცხლის შეწყვეტის შესაძლებლობას ვერ ხედავენ. სომხური მხარის ინფორმაციით, 27-28 სექტემბერს მთიანი ყარაბაღის არმიის 84 სამხედრო დაიღუპა.

ინტენსიური ბრძოლების შესახებ იტყობინება აზერბაიჯანის თავდაცვის სამინისტროც. მისი ინფორმაციით, სომხეთის შეიარაღებულმა ძალებმა გასულ ღამეს არაერთხელ სცადეს კონტრშეტევა ფიზული-ჯებრაილის და აგდერი-ტერტერის მიმართულებებით დაკარგული პოზიციების დასაბრუნებლად, თუმცა, აზერბაიჯანის არმიამ წარმატებული თავდაცვით ყველა მცდელობა მოიგერია. აზერბაიჯანული მხარე აცხადებს, რომ ავიაციის საშუალებებით განადგურებულია მოწინააღმდეგის ჯავშანტექნიკის და ავტომაქანების კოლონა და საარტილერიო დანადგარები.

დღეს დილით, აზერბაიჯანის თავდაცვის სამინისტრომ გაავრცელა კიდევ ერთი ინფორმაცია, რომლის თანხმად, სომხეთის ვარდენისის რაიონიდან არტილერიის გამოყენებით დაცხრილეს აზერბაიჯანის დაშკესანის რაიონი.

მთიან ყარაბაღში საბრძოლო მოქმედებები 27 სექტემბერს განახლდა. მხარეები ერთმანეთს ადანაშაულებენ.

27 სექტემბერს, აზერბაიჯანის თავდაცვის სამინისტრომ განაცხდა, რომ სომეხმა სამხედროებმა ცეცხლი გაუხსნეს დასახლებულ პუნტქებს ყარაბაღის კონფლიქტის ზონაში. სომხეთი კი თავის მხრივ იუწყებოდა, რომ აზერბაიჯანმა ყარაბაღში საჰაერო და სარაკეტო იერიშები მიიტანა. ორივე ქვეყანაში საომარი მდგომარეობაა გამოცხადებული.