ბატონი ღარიბაშვილი ბრიუსელში პრობლემებით სავსე ხელებით წავიდა, - ამის შესახებ ლელოს ერთ-ერთმა ლიდერმა, ბადრი ჯაფარიძემ ფორმულას ეთერში ისაუბრა. ჯაფარიძე ამბობს, რომ მისი ოპტიმიზმი არ შერყეულა, რადგან საქართველოს მეგობრები ქვეყანაში იმ დრომდე დარჩებიან, ვიდრე შეთანხმება არ მოხდება.

"დავეთანხმებოდი ქართულ ოცნებას, სავსე ხელებით წავიდა ბატონი ღარიბაშვილი, ოღონდ პრობლემებით სავსე ხელებით. შესაბამისად, მინდა გითხრათ, რომ ჩემი ოპტიმიზმი არ შერყეულა, იმიტომ, რომ როგორც მოსალოდნელი იყო, ჩვენი ქვეყნის ერთგულმა მეგობრებმა, ევროკავშირს ვგულისხმობ და ამ შემთხვევაში შარლ მიშელს, როგორც ერთ-ერთი უმაღლესი თანამდებობის პირს ევროკავშირში და მის წარმომადგენელს დანიელსონს, მათ თქვეს, რომ ისინი იმუშავებენ მანამ, სანამ მხარეები არ შეთანხმდებიან და კიდევ უფრო მეტს გეტყვით, ჩემი ოპტიმიზმი გაიზარდა ამ განცხადების შემდეგ", - თქვა ჯაფარიძემ.

გუშინ ირაკლი კობახიძემ ბრიფინგზე განაცხდა, რომ ირაკლი ღარიბაშვილი ბრიუსელში ძალიან მსხვილი პაკეტით  და სავსე ხელებით მიდის, ოპოზიცია კი  ცარიელი ხელებით დარჩენილია  ქუჩაში.

კობახიძის ბრიფინგის შემდეგ შარლ მიშელის სპეციალურმა წარმომადგენელმა კრისტიან დანიელსონმა განაცხადა, რომ საქართველოში ვიზიტს ახანგრძლივებს.