ევროპული საქართველოს ლიდერი გიგა ბოკერია ეხმიანება საქართველოს საგარეო საქმეთა მინისტრ დავით ზალკანიანის განცხადებას ისრაელსა და ჰამასს შორის კონფლიქტის შესახებ.

"ჩვენი ინტერესი, ისევე როგორც ყველა ნორმალური ადამიანის და საზოგადოების, არის მშვიდობა და სისხლისღვრის შეწყვეტა რეგიონში , ამავე დროს უნდა გვახსოვდეს, რომ თითოეული ქვეყნის, ამ შემთხვევაში კი ჩვენი მეგობარი ქვეყნის, ისრაელის ფუნდამენტური, სუვერენული უფლებაა დაიცვას საკუთარი თავი.

სამწუხაროა, რომ საქართველოს საგარეო საქმეთა მინისტრის პოზიცია ამ საკითხთან დაკავშირებით არ იყო მკაფიო . მნიშვნელოვანია იმის ხაზგასმა, რომ ისრაელი საქართველოს მოკავშირე სახელმწიფოა და მას გააჩნია სრული უფლება და მოვალეობა დაიცვას საკუთარი მოქალაქეების სიცოცხლე არსებული საფრთხისაგან". - ამბობს გიგა ბოკერია

"საქართველის ხელისუფლება თვალს ადევნებს ისრაელში მიმდინარე პოლიტიკურ მოვლენებს, საქართველო გმობს ძალადობას და სარაკეტო თავდასხმების გამოყენებას სამოქალაქო პირების წინააღმდეგ, რაც რეგიონში სიმშვიდეს არღვევს და არასტაბილურობას ქმნის". - დაწერა დავით ზალკანიანმა მიკრობლოგ ტვიტერზე ისრაელსა და ტერორისტულ დაჯგუფება ჰამასს შორის დაპირისპირების შესახებ.