აშშ-ის პრეზიდენტმა დონალდ ტრამპმა განაცხადა, რომ ირანის „საბოლოო დამარცხების“ შემდეგ ჰორმუზის სრუტის აშშ-ის ტერიტორიად გამოცხადებას გეგმავს. მისი თქმით, ეს „საკმაოდ მალე“ მოხდება.

ტრამპმა ამის შესახებ ნასაუს ოლქში გამართულ მიტინგზე განაცხადა.

მისი თქმით, აშშ-მა ჰორმუზის სრუტის ბლოკადა დააწესა და „არც ერთი გემი გაივლის, თუ ჩვენ არ მოვინდომებთ“.

CNN-ის ცნობით, საერთაშორისო საზღვაო გზის აშშ-ის ტერიტორიად გამოცხადებას, სულ მცირე, რეგიონში ამერიკული ჯარების განუსაზღვრელი ვადით განთავსება დასჭირდება. ეს კი ეწინააღმდეგება ტრამპის ადრინდელ განცხადებებს, რომ ირანთან ომი ხანმოკლე იქნებოდა.

აშშ-სა და ირანს შორის ომის დაწყებიდან თითქმის ნახევარი წელი გავიდა. ჰორმუზის სრუტეში საზღვაო მიმოსვლა ფაქტობრივად შეჩერებულია, რის გამოც მსოფლიოში ნავთობის მარაგები სწრაფად მცირდება. ამასთან, აშშ და ირანი სტრატეგიულად მნიშვნელოვან საზღვაო გზაზე კონტროლისთვის ერთმანეთს უპირისპირდებიან.

ირანი აცხადებს, რომ სრუტეს სრულად არ გახსნის, ვიდრე აშშ მისი პირობების შესრულებას არ დათანხმდება. ტრამპი კი ბოლო დღეებში არაერთხელ ამტკიცებდა, რომ ჰორმუზის სრუტეს აშშ სრულად აკონტროლებს.

ირანი აცხადებს, რომ სრუტეს სრულად არ გახსნის, ვიდრე აშშ მისი პირობების შესრულებას არ დათანხმდება.

თუმცა ტრამპმა არაერთხელ განაცხადა, რომ სრუტე, რომლის გავლითაც საუდის არაბეთიდან, ერაყიდან და სხვა ქვეყნებიდან ნავთობი მსოფლიოს ბაზრებს მიეწოდება, აშშ-ის კონტროლქვეშაა.

„მათ კონტროლი არ აქვთ. სრული კონტროლი ჩვენ გვაქვს. ის ჩვენ გვეკუთვნის და, შესაძლოა, რაღაც მომენტში მათ რაიმე ქმედება განახორციელონ, მაგრამ მაშინ მათ უბრალოდ გავანადგურებთ. ახლა ძალიან ხელსაყრელ მდგომარეობაში ვართ“,- განაცხადა ტრამპმა ოთხშაბათს ჟურნალისტებთან.